قبل لا ادش فالموضوع حبيت أقول اين لا أكره عمتي ولا أبي الشر والمشاكل لهم
هذي مجرد فضفضه أبي ارتاح من هالضيج اللي فيني
قبل لا اتزوج ،. كنا وايد نعاني من تدخل ناس قراب فحياتنا
أتحكموا في أبوي وحتى أتحكموا فطلعاتنا وأكلنا ولبسنا ودارستنا
ما خلونا مرتاحيين أبد .. وعدت نفسي يوم اتزوج ما أخلي حد يدخل فحياتنا أبدا أبدا أبدا
تزوجت الحمد الله وبت ولد .. وبسبب ظروف خاصه ما أقدر أروح مع ريلي أبوظبي لمده أربعه شهور
أوكي وين المشكله
المشكله انه عمتي متحكمه في ولدي … ولدي تؤه صغير ما كمل شهرين
كل وحده فينا خاطرها تربي عيالها عالطريقه اللي تشوفها صح وهذا من حقي لا هو عيب ولا حرام
وكل شيء أنا أسويه مع ولدي ما يعيب عمتي …
أنا قلت بتبع نظام الدكاتره ست أشهر حليب أم ووقت الضرورة صناعي
وعمتيي مصره تشربه ماي قلتلها انتوا غير وهالجيل غير قالت لا انتي ما تفهمين وأنا ربيت وكبرت وأنا أعرف
أقسم بالله بنات أنا سكت وبلعتها مع اني مش مقتنعه وما أبيها تشربه
وكلت أمري لله وش أسوي بعد
وكل ما شافتني مقمطه الياهل تروح وتفتحه مع اني ما اقمطه إلا وقت ارقاده وتلعب باذنه لين ما ينش
والله اتضايج صح وخاصه يوم يكون توه راقد وتقومه من النوم.
ويأت ولدي فتره يمص أيده وتفاجات انه يوم يكون عند عمتي ويصيح تحط أيده فحلجه عشان يسكت والحينه صارت عاده عنده
واليوم ولدي كان عنده مغص راحت ودهنت على بطنه فكس ويوم ريلي ياب الولد حقي والله اختنقت من الريحه فمابالكم الياإهل ورحت العياده تم يقول الدكتور وش دخل الفكس بالمغص وقعد يقول يمكن الولد يتحسس من هالشي ولا تحطون له مره ثانيه
والله خذتني العبره ويلست اصيح. أحس اني أم فاشله ما أقدر على شيء
حتى ألعابه مايرضون اشتريله أونه عن الحسد ..
أدري بتقولون انتي ضعيفه أو وين ريلج
والله أنا مب ضعيفه. بس ما. أبي أسوي شيء يضيج ريلي
ويؤكد ويوم أكلمه بهالخصوص يعصب مني ويقول انتي ما تحبين أهلي عسب جي ما أقدر أقول شيء
ودي أربي ولدي بالطريقه اللي تعيبني واللي أنا اشوفها صح
تعبت من تدخلات عمتي بخصوص ولدي
وخائفه يطفح الكيل عندي 
