خواتي ,,
كالعاده دائما وابدا ,, موضوعي يستند على موقف واقعي حبيت اعرضه لكن واخذ ارائكن فيه
ليش العلاقه بين حريم الاخوان عادة تكون مب زينه ؟؟؟ أكيد مب الكل بس الأغلب تحسين فيه بينهم توتر ومقارنات وعليه تستوي المشاكل بينهم وعدم الوفاق ,, بختصر لكم محادثه دارت بين حرمتين ماخذات اخوان في مقطعين
مرت الكبير :
انا اهله يحبوني وعلاقتي فيهم وايد قويه وانتي محد يدانيج !! انا اختيارهم له انا الغاليه وانا المقربه وانتي خذج غصبن عنهم ومايحبونج وسرقتيه عن بنت عمه وانا اهله يفضلوني على كل حريم عيالهم وانا وانا وانا وانتي وانتي وانتي ,,,,
مرت الصغير :
خلي اهله ينفعونج يوم يصفعج طراقات ويترفس في جبدج !!! خليهم ينفعونج يوم يحقرج بالشهور ولايسويلج سالفه ,, خليهم ينفعونج وانتي وجودج وعدمه عنده واحد ,, الشي الوحيد اللي اهله نافعينج فيه انهم جابرينه عليج ومخلينج وعياله طوق غصه في رقبته مب قادر يفتك منج !! ووووووو
ليش توصل الغيره لحد الحقد والكره بين حريم الاخوان ؟وهل اهل الريل لهم دور في هالخلافات واشعالها او اخمادها ؟
المشاكل الازليه بين اهل الريل(( امه أو اخته أو مرت اخوه )) ومرت الولد وماتخلص ,, احيانا اهل الريل يكونون عون لمرت ولدهم واحيان ثانيه يكونون عليها فرعون ,, ومرت الولد احيانا تكون راعيه قال وقيل ومفرقه ,, واحيان ثانيه تكون مولفه ومجمعه ,,
أهل الريل متي يكونون اهلج ؟ ومتي يكونون اعدائج ؟ هل الافضل تكسبينهم والا تكسبين ولدهم ؟متى يكون البعد عنهم غنيمه ومتى يكون في القرب منهم راحه !!!
كل هاي التساؤلات اطرحها لكن لعل وعسى نستفيد منها ونفيد خواتنا المتضررات ,, بذكر لكن رايي في رد منفصل ,, أدري ان هالموضوع ذو شجون و فنون !!! انتن شو رايكن ؟
