التصنيف: الحياة الأسرية

والله حبايبي ماعرف من وين أبتدي وشو أقول ؟

عمري ما توقعت إني راح أمر بكل هذا فـ حياتي والله يا بنات شي ما يدش العقل

بغيت عونكم ومشورتكم وبالذات من البنات الكبار المتزوجات والأمهات "" أتمنى أنكم توقفون معاي في همي وتدعون لي أن الله يفرجها "" مالي غير الله أولا وأنتوا ثانياً

من وأنا صغيره كان حلمي أعيش الدنيا بفرح وسعاده …

بس شوفوا شو اللي صار لي بكل مراحل حياتي اللي للحين محفوره في ذاكرتي وما تروح عن خيالي أبداً

أنا و أختي الصغيره وحيدات أمي وأبوي من البنات وعندي اخواني كلهم أولاد عمري ما حسيت بحلاوة أن تكون عندي أخت إلا بعد مرور 10 سنين لين ما شرفتني أختي الصغيره اللي فرحت بـ وجودها بحياتي وقلت الحمدلله صارت عندي أخت ….. بس للأسف فرحتي هاذي ما اكتملت لأنها صغيره وما تفهم مشاعري كنت أتضايق دايماً وأقول ليش الله ما عطاني خوات أكبر عني أبوح لهم باللي في خاطري وأعيش معاهم حياتي ومراهقتي وأشاركهم أسراري …!!!!!! عشت حياتي ومراهقتي وكنت أتضايق وايد لأني ماكنت أحس أن في حد جريبي يشاركني همومي وتفاصيل حياتي …. أمي إنسانه عصبيه وما تتقبل شي وأنا ما أحب أقول لها شي لأنها تعتبر المراهقه شي تافه ومرحله كلها دمااار فكانت تحرمني من كل شي وتهزبني على أي شغله ماعرفت شي غير البيت والمدرسه وصديقه كانت عندي من مرحلة الطفوله والحمدلله كانت علاقتي فيها تمام وكنت أعتبرها أختي وصندوق أسراري اللي انحرمت منه في البيت ….. وحاولت أعيش حياتي مثل أي بنت تكون عندي أسرار ومشاعر وحب وكللل شي ….. وربيعتي ما كانت تقصر وياي وكنا مرتاحين مع بعض ……

وأنا في مرحلة مراهقتي في أيام الإعداديه كنت أحب شخص وهالإنسان الصراحه ما عمره قالي شي ولا كان امبينا أي شي …. ماعرف كيف أنا حبيته يمكن لأنا ونحن صغار كنا نلعب مع بعض وجي بس يوم كبرت شوي بديت أقلل ظهوري من البيت وأستحي لما أشوفه وأشرد ….. ماعرف كيف حبيته لكن كل ما أشوفه بس يمر حذال بيتنا وهو رايح لبيتهم كنت أحس بإحساس غريب !!! أستحي وأنخبص من شووو ماعرف والله !!! بس مع الأيام عرفت بأني أحبه لأن هالشي واضح من يوصل لي طاريه خلااص أحسني أنخبص وأستحي … وأموت لو ما شفته فـيوم …. لكني ما بحت بهالحب لأي حد وقلت البنت عيب تقول لفلان أنها تحبه وأنا أساسا ما كنت أكلمه بس لمن كنت أرد من المدرسه ألاقيه مار حذالي أنعفس وهو المسكين ينزل راسه لأنه إنسان محترم ومب من فئة الشباب اللواته …. فكنت أطوف حذاله وأنا منزله راسي وهو نفس الشي لين ما كل واحد فينا يدخل بيته :$ …… وتميت على هالحاله 4 سنين وأنا أحبه وهو ولا داري بحبي له !!!! لين ما وصلني الخبر كالصاعقه لمن كنت في المرحله الثانويه إني محيره لولد عمي اللي أصلاً وأساسا كنت ما أدانيهم لأنهم الصراحه ناس ما يستاهلون كلهم مصالح وبنت عمي اللي كانت ما تسأل عني حتى قامت تتقرب مني عشان أخوها وأنا مب محطيه هالشي في بالي أبداً وما كنت مقتنعه فيه وأهلي كانوا يدرون بس ساكتين لأنهم يتريوني أخلص من الثانويه عقبها يصير خير ومرت الأيام وأنا حالتي مكسوووره وكنت دايماً أقول شسوي شو أقول لأهلي دام أنه بيي يخطبني ولو غصبوني شسوي ؟؟؟ مليون فكره في راسي توديني وتييبني وأنا كنت أدري أن الإنسان اللي أنا احبه مستحيل يخطبني لأنه ما يدري بحبي له والله هو اللي يعرف وين النصيب ….. بس مب عشانه لأني أصلا ما كنت مقتنعه بولد عمي ومن عقبها ابتدت المشاكل اللي كنت خايفه منها لأن قوم عمي راعيين مشاكل وجي الله يستر عليهم …. كانوا يحاولون يجبروني أتواصل مع أخوهم بأي طريقه حتى لو بالرسايل وأنا طبعا رفضت لأني قلت لهم بأن محد يعرف النصيب وين وهم بدوا يشكون بأني ماباه وجي فقاموا يسوون لي أفلام ويقولون فلانه تحب خطيبج وفلانه ترمس خطيبج وفلانه تسوي حركات لخطيبج >> أنا أدري بأنهم كانوا يسوون كل هذا عسب يستفزوني ويغايضوني لا أكثر ….. وفوق كل هذا يتحكمون فيني ويقولون عني رمسات ويا البنات جدامي بويه ومن وراي بويه ثاني …. أنا استغصيت منهم لأني ما أنزل كرامتي لحد وقلت لو يا وتقدم لي ما بوافق عليه واستخرت فيه وما ارتحت الصراحه …… وقمت أطنشهم وأطنش رمساتهم اللي كانت كل ليل وكل نهار ما تفارقني ….. بتقولون ليش ما خبرتي اخوانج أنا بقول لكم أنا ماحب أسوي مشاكل بين أهلي وبعدين لو أنا رمست بهالموضوع أخواني ما بيرضون لأن بينهم حساسيات ويا قوم عمّي فهالشي بخيليهم يذبحونهم وبعدين لو تسرعت كللل الموضوع بينحط ع راسي أنا عقب لأنهم بيقولون ليش اعيال العم مضاربين وشو مستوي واعيال عمي ما بيقصرون بالرمسه وبيقولون فلانه فيها وفيها ونظرة مجتمعنا ما ترحم على البنت وبيقولون أكيد البنت مسويه شي وأكيد وأكيد إلخ من الكلام الفاضي اللي ماله داعي بس شو نسوي دام حريمنا ومجتمعنا تفكيرهم تبن …… فقلت أبلع الشر وأسكت عشان لا يصير اللي أكبر من هذا وإن شاء الله ربي بيفرجها ….. مع الأيام لين ما تقدم لي ولد عمي وأنا بكل ثقه رفضته وقلت الريال مافيه عيب بس أنا ما ارتحت له وجي ……. واخواني نفس الشي ما كانوا راضيين لأن امبينهم حساسيات وجي بس قالوا لي هاذي حياتج أنتي ويا هالإنسان لا تحاتينا نحن ما بنتدخل في حياتج اللي يريحج سويه ….. وأنا قلت لهم راحتي من راحتكم وأنا ماباه لأني مب مرتاحه له وجي ……. وهذا النصيب والله يكتب له الخير ويا غيري …. وردي كان مثل الصاعقه عليهم وطبعاً من بعد هالسالفه بدت المشاكل والبلاوي والرمسات اللي مالها داعي كله عشان شووو ؟ كله عشان إني رفضت ولدهم وبدت المشاكل ويا بنات العم اللي ما خلوا عني كلمه ما قالوها بس أنا كنت أسكت احتراما لعمي ومرته واحتراما للعلاقه اللي امبينهم وامبين أمي وأبوي …. وكنت أقول هاييل تافهات ما عندهم سالفه وأنا أحسن عنهم بمليووون شو كالفني أسوي مشاكل وياهم وأصدع راسي …… وفريت هالموضوع ورى ظهري وهم ما قصروا بالرمسات اللي الواحد يستحي يقولها عن أهله وهم ما شاء الله عليهم لا حشموا لا قرابه ولا هم يحزنون عافان الله قلوبهم خبيثه ……. وخليتهم على حالهم لأن هم مب أول ناس يرمسون عن أعراض غيرهم كل الناس الحين لسنتهم ما شاء الله بدل لا يستغلون نعمة اللسان بالإستغفار وذكر الرحمآن …… يضيعونها بالحش والذم والنميمه فـ الناس وبنات خلايق الله ……. لكن شو أقول غير الله كريم وربي بيعوضني خير إن شاء الله وأنا عارفه قدر نفسي وواثقه وماله داعي أعلم الغير قدري وين ….. وعشت حياتي وأنا الصبر فيني مل ….. يوم ورى يوم أقول فلان ما بيتقدم لي ؟؟ فلان وينه الحين ؟؟ فلان شو يسوي الحين … هل هو يحبني ؟؟؟؟ هل ممكن بيوم يصير ريلي ……؟ والله أسئله قد شعر راسي بس عقبها انصدمت أن اعيال عمي مخبرين كل الناس إني مخطوبه لأخوهم عسب محد يتقدم لي !!!!! وأنا انهديت عليهم وانصدمت وااايد …. وسرت خبرت أمي أنا مب مخطوبه له وأمي سارت رمست أمه وقالت منو قال هالكلام وأمه تقول ماعرف يمكن سوء تفاهم وجي عقبها خلاص هم تفاهموا وسكروا الموضوع … بس أنا اللي حاز في خاطري أن هالسالفه وصلت لحبيب القلب اللي خاشته في قلبي ومحدن درى عنه وهو حاط في باله إني لولد عمي …..

قلت ماعليه الله كريم يمكن نصيبي مش عنده وأنا لو أموت ما أروح أقول له فلان أنا أحبك :$ ……

و عقيت الموضوع ورى ظهري بس حبه في قلبي ما راح وما زال بس كنت أحاول عشان مصلحتي ودخلت عقبها الجامعه ودرست أول سنه وللأسف طحت في غلطه لخبطت حياتي فو حدر …… بالصدفه تعرفت على واحد عن طريق الفون …. كنت أدق على ربيعتي وأنا غلطت بالرقم بس محد رد وعقب فريت الفون قلت شكلها راااقده …. وتميت أذاكر وألهي عمري لين ما تدق هي علي …. شوي رن الفون ورديت ما انتبهت للرقم ….. قلت ألوو سمعت صوت واحد يقولي هلا ؟؟ وأنا هني !!!!!!!!!!!! ماعرفت شقول أقوله منو يقولي السموحه أختي أنتي منو أنتي اللي داقه !!!!!! أنا استغربت لأني ما دقيت له شقا يقول أنا دقيت قلت له أخوي شكلك مغلط قالي لا أنتي داقه شيكي ع فونج عشان تتأكدين وشيكت ع المكالمات وفعلا طلعت أنا اللي داقه عليه وهو ما رد ؟؟؟؟ قلت له اسمحلي أخوي والله مادري دقيت لك بالغلط قالي لا مسموحه ما صار شي وسكرت عنه …… عقب هو طرش لي مسج قالي حصل خير وأنا منخبصه منه لأني افتشلت ….. وطنشت الموضوع ……. مع الأيام وصلني هالرقم مره ثانيه بـ مسج وكاتب فيه مسج عن اليمعه وجي ……. وهالمسج يوصلني بس من يمعه ليمعه … ولا مره طرش لي شي إلا بكل يوم يمعه وأنا أطنش وأطنش عقبها دزيت له مسج وقلت له أخوي اسمح لي بس أنت ليش تطرش رد لي بمسج قالي أنا أطرش لكل الأرقام الموجوده عندي والسموحه لو أزعجتج وأنا رديت عليه قلت له أنت امسح الرقم ليش مخزنه عندك ورد استسمح مره ثانيه منّي وأنا مستغربه منه لأنه ما أذاني ولا شي بس من يمعه ليمعه بس أنا ما تحملت جي أقول ليش رقمي للحين عنده ؟!!!! وطنشته عقب ……. بس عقب فتره وصلني اتصال من اخته قالت لي هلا قلت لها أهلين وأنا ما أدري أنها أخته أساسا قالت لي منو معاي قلت لها أنتي منو انتي اللي داقه قالت لي أنا أخت فلان اللي دقيتي عليه من فتره وأنا !!!!!!!! قلت لها خير أختي في شي قالت لي لا بس السموحه يعني نحن بنات ناس وأنتي بنت ناس والحمدلله ما يعيبنا شي بس أنا حابه أتعرف عليج لأن أخوي الصراحه يباني أتعرف عليج هو حاس بأنج إنسانه عاقله وفاهمه ومحترمه وياني وقالي دقي على هالرقم والسالفه جي وجي وجي وأخوي عمره ما اهتم بأحد وهو بس نيته يتعرف على وحده محترمه ويحبها وتصونه وتصون اسمه ..!!!! أنا استحيت منها لأن مبين عليها وحده كبيره فقلت لها السموحه أختي بس هالشي منقود وعيب عندنا نحن لو هو يبا يتقدم الرمسه بتكون عند الرياييل ……. قالت لي ما عليه أنا وأنتي هالفتره بنكون على تواصل وإذا الله أراد يستوي امبينكم نصيب فالحمدلله على كل حال …… وسكرت عني وأنا مو مستوعبه اللي صار ….. قلت خل الأيام تمر واللي كاتبه الله بيصير وتميت متواصله معاها لأنها بين فتره وفتره تتصل وتسولف وهي ما شاء الله عندها اعيال متزوجه ….. وأنا حبيتها لأني اعتبرتها أختي الكبيره اللي انحرمت منها في حياتي …… وما كان امبينا إلا كل احترام وتقدير …… مع الأيام اكتشفت أن ربيعتي تخوني ؟؟؟؟؟ ربيعتي توأم روحي تخوووني ؟؟؟؟؟؟؟ لييييييييش ؟؟؟ رمست من وراي عند البنات بأني وحده ما أسوى وإني وإني وإني ……… وتخيلوا البنات شو بيقولون هاذي ربيعتها وجي تقول عنها ……. يتني حالة صدمه وأنا أبا أعرف هي ليش جي سوت لين ما اكتشفت أناه سوت هالشي انتقاما لحبيبها اللي أنا نصحتها بأنها تبتعد عنه وهي قالت لي أنتي تغارين وأنتي وأنتي وماتبين سعادتي وسارت خبرته وهو سار قال لها ودريها هاذي ما تستاهل و ودرتني عشان واحد عرفته من شهرين وأنا اللي تعرفني من أيام الطفوله وامبينا عمر …… احترمته وما احترمت العشره اللي امبينا …… وأنا والله ما نصحتها إلا من خوفي لها لأنه ياما سوا لها مشاكل بس هي غبيه تحبه وكل مره تسامحه وهو عادي عنده ينشر صورها ولا يهتم فيها بس هي أونه لا هو يحبني وماعرف شو وأنا اكتشفت عن طريق وحده أنه هالشخص يرمسها و يرمس ربيعتي بنفس الوقت والله العالم كم وحده يرمس …… بس أنا من بعد ما قالت لي هالكلمه قلت لها الله يسامحج وشوفي طريقج اللي يريحج وسرت عنها وخليتها ……. قلت مالي خص فحد اللي علي سويته بس كنت في حالة انهيار وسبحان الله بنفس اليوم وأنا منسدحه ع الفراش وصلني رقم وأنا كنت أصيح وحالتي حاله بس زخيت عمري وصوتي كان تعبان فرديت إلا هو واحد يقولي السلام عليكم وأنا رديت عليه السلام …….. سمع صوتي غير قالي فلانه اشفيج ؟؟؟ وأنا منصدمه أنت منوو ومن وين تعرفني ؟ قالي أنا فلان أخو فلانه !!! اشفيج صوتج مبين عليه أنج كنتي تصيحين …. أنا سكتت لأني انصدمت منه هو بعد ليش دق علي قلت له السموحه مافيني شي ولا تدق علي مره ثانيه بس ما سكرت لأني ماعرفت كيف أسكر قالي فلانه اعتبريني أخوج والسموحه جاني أزعجتج بس والله ما أخليج دامج تصيحين قلت له السموحه أنا بخليك قالي أنا الود ودي أخلي أختي الحين ترمسج بس هي الحين في المستشفى ويابت بيبي وحبيت أخبرج " يبا يرمسني بأي طريقه " … ماعرفت شقول واستوعبت الوضع اللي أنا كنت فيه ويلست أصيح وهو يحاول يهدي فيني ويقولي شو فيج و منو مزعلج و والله دموعج غاليه وعقبها قالي بخليج تهدين وبدق عليج ويا ويلج لو ما رديتي والله أزعل …… سكرت عنه وأنا في حاله يرثى لها لأني انفجرت مره وحده ……. و عقب ربع ساعه دق علي واحترت أرد وإلا لا بس لأني كنت في ضيج وأبا حد يسمعني رديت عليه وتم يسولف ويهدي فيني عقب قالي خبريني شو فيج ؟ ومن بعدها قلت له السالفه من طأطأ للسلام عليكو وقالي دام هاي تسمينها ربيعه الله يسامحج بس ….. العشره يا بنت الحلال ما تهون إلا على اعيال (……) وهاذي دام باعتج عشان واحد ما يستاهل بييها يوم وبتندم ولا تعورين راسج الدنيا فيها اللي ألعن من جي وأنتي صغيره والعمر جدامج فماله داعي هالصياح كله والزعل والنكد ……. أذكري ربج وقومي صلي محد نافع حد في هالدنيا واللي بيعيش عشان يرضي الناس تراه غلطان نحن نعيش عشان نرضي رب العالمين بالعبادات والطاعات ….. ومن بعد هالرمسه قالي أنا بخليج ترتاحين الحين وإن شاء الله ما بيصير إلا الخير …… ومن بعدها لا اتصل ولا دق وأنا تميت أفكر بكلامه وباللي قاله لي ودقيت على أخته مرتين ما ردت علي لأنها كانت تعبانه شوي بعد الولاده فطرشت لي مسج استسمحت مني فيه …….. مع الأيام تولهت أسمع حس هالإنسان مره ثانيه ماعرف ليش ؟
يمكن لأنه حسسني بالاهتمام وملا الفراغ اللي كان في قلبي .. فتميت أتريا اتصاله وفعلا بعد أسبوع وشي اتصل يسأل عني وأنا طرت من الفرحه وما صدقت قلت الحمدلله اتصل وكنت مستاااااااانسه وااااااااايد ورمت الأيام ونحن على علاقه عبر الفون وما كان امبينا إلا كل خير

السموحه لأني طولت كليكم

مشكورين بنات والله دعواتكن تييب الفرح وربي …

من بعد ذيج الأيام … كنت حاطه جدامي أمل إني راح أرتبط بهالشخص لأنه صار لي الأبو والأخو والصديق وكل شي فـ حياتي …. لأول مره أحس أن في حد يهتم فيني هالكثر يخاف علي حتى من وخزة الإبره ….. وكنا ليل نهار نعين ونعاون على كل خير …. وطول هالفتره وأنا محطيه أمل أن هالإنسان راح يصير شريك عمري في يوم من الأيام …… بس للأسف كل ظنوني خابت …. كملنا سنتين عمرنا فيوم ما شفنا بعض فيها !!!! لين ما يت أمي في يوم من الأيام وزخت فوني وهو يرن وردت عليه ….. وهو يتحرا اللي رديت أنا وكنت مسيفه الإسم باسم بنيه …. فهو حس أن في شي غلط وما رمس لأني عودته بأني أنا اللي أرمس قبل ….. فما تكلم وأمي شكت فالموضوع وسكرت وخذت الرقم من فوني ودقت عليه من فونها عقب ساعتين …… وهو رد عليها لأنه ما عنده خبر بأنها الوالده اللي داقه عليه و صارت الطامه …… كلمته ويلست تغلط عليه وعلى تربيته وعلى خواته وأمه وأبوه وماعرف شو قالت وأنا خبر خير لأني ما أدري أنها زخت الفون أساسا وخذت الرقم …. عقبها سكرت عنها ويتني تتحرطم وضربتني ضرب بحياتي كلها ما ارح أنساه وقالت لي أنتي (….) و سبتني بألفاظ عمري ما توقعتها أنها تقولها ودعت علي بالحراق وأن الله ياخذ روحي وتفتك مني ولا أسبب لها العار والفضيحه على قولتها
وأنا أنكرت كل هذا بس هي قالت أنا شفت المكالمات وكل شي وفونج ما راح تلمسينه مره ثانيه والجامعه مالج طلعه لها مره ثانيه مكانج هني في غرفتج ولابي أشوف رقعة ويهج في البيت …… ويلست أصيح من خاطري لأنه كان يباني وحاول بكل الطرق وطرش خواته وأمه بس ماشي فايده أمي متحلفه تذبحهم وتقول هاييل ما يخافون الله في بنات الناس وهاييل وهاييل و من عقبها لاني عرفت عنه شي ولا شفت الجامعه ولا عشت حياتي مثل كل البنات …. كان خاطري أدرس وأخلص وآخذ شهاده جامعيه بس للأسف أمي دفنت أحلامي بسبب غلطه ثبتتها فيني وخذتها حجه على كل تحركاتي ولليوم وهي تذلني في هالسالفه ما أيلس أنصح وإلا أقول كلمة خير تحقرني وتقولي أنتي آخر وحده ترمسين في هالبيت وأنتي وأنتي يعني تجريح بمعنى الكمله والسالفه هاذي صار لها سنتين مضن يعني خلاص ماله داعي كل هذا والإنسان مش معصوم من الغلط وكل بني آدم خطاء … وأنا أقر بأن اللي سويته كان غلط بس محد معصوم من الزله في هالزمن …. محد كامل في هالكون غير الله سبحانه …… وهالسنتين أنا قضيتهم بلا شغله ولا مشغله كله رقاد و تيفي لا أكثر ….. حاولت أقضي وقتي بأي شي بس حسيت بضيييج لأن مالي حد أشكي له همي من بعد رب العالمين …. و مرت هالسنتين وأنا محبوسه بين جدران هالبيت اللي كنت أحلم باللحظه اللي أظهر فيها منه وأروح لحد يهتم فيني ويشاركني همومي ألا وهو زوج المستقبل ….. وفعلا في يوم صارت المفاجأه اللي أنا بحياتي كلها ما توقعتها

حبيب الطفوله " رجع لي " و خطبني :$ … يا ناس مش معقول اللي قاعد يصير حسيت إني بحلم والله دشيت تكرمون الحمام أمط شعري بعد ما ياني عمي يقولي فلان متقدم لج …. والله يا بنات الله أعلم بحالي حزتها كنت أصيح من الصدمه وأرتجف وأقول من بين كل هالخلق رد ورجع لي مره ثانيه الإنسان اللي أنا تمنيته في طفولتي ؟؟!! …… طرت من الفرحه و قلت يااا رب أنت أعلم بحالي يمكن استجبت لحلمي اللي دفنته من سنين … وقلت يمكن هذا جزاء الصبر اللي صبرته على كل اللي قضيته في حياتي وفعلا تمت الخطووبه وعقبها ملجنا ….. بس أمي اعترضت على سالفة التواصل امبيني وامبينه على أساس أن هالشي عيب ومنقود عندهم وأنا ضايجه فيني الدنيا أبا أرمسه ما صدقت على الله رجع لي …. وخذت إيميله من عند أخته ورمسته …. من بعد الملجه …. وهو إنسان طيب ومحترم وكله يسولف ويضحك وياي وكل بنت تتمناه ….. قلت أنا الماضي راح أنساه وأفره ورى ظهري وأبدى حياه يديده معاه …. ومرت الأيام ونحن نتواصل يا من المسن يا من فون البيت ….. رمساتنا كانت بالدسه كأنا حراميه هههههه …. بس والله عشان هو كله يباني أرمسه ويتشوق لسوالفي ويحب لما يزعلني ويراضيني وخاطره يشوفني حاله حال أي واحد من ربعه اللي تزوجوا … كان كله يقولي فلان جي سوا ويا حرمته وأيام فلان كانت حلوه ويا حرمته …. إلخ …..
وأنا أغتص لأن أهلي ما يخلوني أرمسه شرى الخلق وقلنا لبعض ما عليه هذا المكتوب والحمدلله بس أنا نحن بنكون فالأخير حق بعض …. بس مع الأيام بدى الريال يتغير علي … ويبتعد وأنا مستغربه لأني حاطتنه على راسي من فوق وقام يقولي أنا بتزوج 2 أنتي و بخليج تختارين لي الثانيه وكنت أقول فخاطري هذا يبا يغايضني وكنت أضايج ساعات و أطنش ساعات بس فعلا طلع الموضوع جدّي وأنا ضاقت فيني الدنيا لأنه يقول أنه يبا يعيش حياته على راحته ويبا ياخذ 2 عشان يكون أسره كبيره … طبعا أنا هالشي لو أموت وتنقص رقبتي ما أخلي حد يشاركني في ريلي بس هو معاند وكله يعصب لو رفضت ….. في يوم قلت في خاطري ليش ما أطلع منه الصج واللي في خاطره وضفته من إيميل ثاني وحاولت أقردنه وفعلا قردنته ويبت راسه وقلت له أنت تحب قالي لا ما أحب !!!!! وهو دايما ما يمل من كلمة أحبج ويقول أنه يموت فيني وهني يقول ما أحب قلت لا يمكن يسولف قلت له احلف بأنك ما تحب قالي والله العظيم إني ما أحب وأنا دارت فيني الدنيا وقلت في خاطري كيف جي وليش هو يجذب علي فواجهته وقلت له مشكور والله يا ريلي العزيز على صراحتك هاذي وأنت على راسي من فوق والسموحه جان غثيتك وظهرت من المسن وأنا أصيييح ماعرف أفضفض حق منو … عقب يومين حدرت شفته موجود حدر يرمسني وقالي الحركه اللي سويتيها عيب وقلت له أنا لا والله دام اللي سويته أنا عيب أنت شو تقول عن نفسك هاه !! قول أنك ريال ومن حقك هالشي … أنا ما بعارضك وأنت حرر بس ليش تنافق وتجذب علي وتقول أنك تحبني و و و و إلخ …. طلعت كل اللي في خاطري عقب سكتت جان يرد علي ويقولي أنتي اللي جبرتيني وماعرف شو عقبها سكرت عنه لأني ما تحملت كلامه ….. بس تخيلوا من بعد كم من يوم اكتشفت بطريقه إنه ما خذاني من رضاه وهو خذاني بس عسب يرضي أمه …. لأن أمه متحلفه عليه إن ما خذاني ماراح تكلمه وبتزعل عليه لين يوم الدين وأنا والله يا بنات من عرفت الصج وأنا مقهوووره وأصيييح وأعض أصابعي وأقول يا فرحه ما تمت …… وعن موضوع زواجه من الثانيه أنا مب راضيه فيها بس هو مستغل ضعفي لأنه يدري بأني ما راح أقول لحد لأن محد يعرف بأني أرمسه أساسا …. ومن هاك اليوم وأنا ماعرف شسوي و تغير علي وايد وما قام يرمسني وكله يحقرني …. واللي مخوفني أكثر أنه عرف بسالفة اللي كنت أرمسه قبل وكان يعرف قبل ما يملج فيني وأنا ما كنت أبي أقوله ولا فكرت بس للأسف هو عرف كيف ماعرف وصارحني بهالشي وقالي أنا ما بحاسبج على الماضي أنتي زوجتي الحين وأنا خذتج وأنتي في عصمتي الحين …. ومن بعد هالسالفه أنا يلست أصيح لأنه عرف بالسالفه وقالي لا تحاتين لو كنت من هالشباب اللي يفكرون بالبنت غلط جان ماخذتج وأنتي شيخة الحريم وأنتي وأنتي … بس الحال ما ظل مثل ما هو عليه الحال تغير .. لين ما ضقت وحدرت عليه وعطيته كل اللي في خاطري وقلت له أنت مب ملزوم تحبني بس أنا حبيتك وكله منك أنت اللي أوهمتني بحبك وعلقتني فيك يوم بعد يوم والحين ياي تقول بأنك ما تحبني أنت ليش تظلمني معاك أنا ما سويت لك شي ليش خليتني أفرح مثل المينونه وأتفاخر فيك جدام العالم بأن محد يسواك فالبشر وأن محد في قلبك غيري أنا وبس ….. أنت ريلي على عيني وراسي من فوق بس مثل ما أنت تغيرت أنا بعد راح أتغير وآخذ مجرى ثاني بحياتي ومالي رمسه معاك من اليوم ورايح ليش أرمس شخص أحس بأني مجبوره عليه >>> يا بنات هو ما يدري بأني عرفت أن أمه اللي جبرته فيني ….. بس قلت له هالكلمه عشان ألمح له وقلت له بأني انظلمت وايد في حياتي ومابي أنظلم أكثر …. وفوق كل هذا يا بنات أمي وايد تتدخل في خصوصياتي ويا ريلي وتقول بعد العرس سوي جي وروحي جي وجي وجي وجي وجي … لا تقولين أنا معرسه خلاص محد يخصه فيني .. و وايد تتدخل حتى في رمستي ويا ريلي ….. يا بنات الحال ضاقت فيني

أولا من الأهل

ثانيا من الربع

ثالثا من الريل

لا أنيس و لا ونيس في حالتي

طاالبتكم طلبه والله دخيلكم لا تردووني ساعدوني والله مالي حد غيركم … والله ولو بدعوه من داخل قلوبكم أنا اللي شفته في حياتي مب شويه بس حبيت أفضفض لكم وحاولت أختصر كل الكلام اللي بقوله …..

مالي حد من بعد الله سبحانه وتعالى غيركم

و السموحه منكم يميع