التصنيف: قسم الطبخ

اليوم يايبتلكم طريقة خلية النحل وأنا مجربتنها وطلعت وايد لذيذه..
بصراحه الطريقة ماخذتنها عن بشكارة اختيه..
ويوم جربتها قمت ما أسوي غيرها..
وتقدرون تسوون كرواسان بنفس العيين..

المقادير..
ـ 2 كوب طحين رقم 1
ـ رشة صغيرة ملح
ـ 1 فنجان قهوة سكر ==> (يعني مقدار السكر اللي بتحطينه = 1 فنجان قهوة مب تتفلسفون وتحطون قهوة!)
ـ بيضة وحده
ـ 1 ملعقة طعام خميرة فورية
ـ 1 ملعقة صغيرة بايكينغ باودر
ـ استكانة شاي وحده زيت ==> (مثل ما قلت عن السكر مقدار الزيت = استكانة شاي صغيرة مب تتفلسفون هنيه بعد وتحطونلي شاي في الخلطة!!)
ـ 1 ملعقة طعام حليب بودرة ( بس إذا بتسوون كرواسان لا تحطون حليب بودرة، سو السبب ماعرف بشكارة اختيه ما خبرتنيه قبل لا تسافر!!)
ـ ماء حسب احتياج العجين
ـ جبن كيري

الطريقة:

تخلطين المواد الناشفة قبل (الطحين + الملح + السكر + الخميرة + البايكينغ باودر + الحليب البودرة)
بعدين تضيفين لهم البيضة والزيت وتعينين بإيدج وشوي شوي تضيفين الماي لين ما تستوي عندج عجينة متماسكة وطرية..
تخلين العجينة ترتاح من ساعة لساعة ونص بعدين تكورينها كور بحجم حبة الجوز وتحشين كل كرة بربع قطعة جبن كيري (يعني قطعة الكيري الوحده تسوينها 4 قطع) وتصفينهم في صينية بايركس بس لا تلصقين الكور في بعض خلي بينهم مسافه لأن الكور بتنتفخ في الفرن..
بعد ما تخلصين ادهني الصحن من فوق بالحليب أو البيض ورشي عليه سمسم ولا تنسين تدهنين الصحن من تحت بالزيت قبل لا تصفين فيه الكور..
دخلي الصينية في فرن حار وبعد خمس دقايق خفي الحرارة وخليها متوسطه عشان خلية النحل ما تحترق من تحت.. وخليها في الفرن لين ما تحمر من تحت بعدين صكي الفرن من تحت وافتحيه من فوق خليه الويه يحمر شوي مب وايد.. وأول ما تطلعين الصينية صبي عليها عسل أو شيرة بس لازم الشيرة تكون بارده..
وطبعًا الكل يعرف كيف يسوي الشيرة ( كوب ماي + كوب سكر + شوي زعفران + طشة ماي ورد) تخلينهم عالنار فترة لين ما تحسين إن المزيج غلظ شوي وبعدين تخلينه يبرد.. إذا حسيتوا إن الشيرة مب غليظة كفاية زيدوها سكر..
ولازم يوم بتصبون الشيرة على شي إذا الشيرة حارة الشي اللي بتصبون عليه يكون بارد والعكس..
يعني إذا الخلية حارة لازم الشيرة تكون بارده.. فهمتوا علي؟!

جربوها وخبروني شو بيستوي وياكم..

وبالهنا والعافية..
أي استفسار أنا حاضرة..