اللي ريلها ما يظهرها تدخل عندي الحل ؟؟؟ عالم الامومة

كنت مارة على قسم المشاكل الاجتماعية ولاحظت واااايد البنات يتشكون من رياييلهم انهم ما يظهرونهم

الحل عندي بس لازم تكون عندج ارادة قوية وصبر

نبدا :

حاولي تغيرين مكان جلوسج اذا غرفتج او صالتج او عندج بيت روحج غيري الديكور والجلسة والاكسسوارات مب شرط يكلفج مبلغ كبير لو لمسات بسيطة والمهم انج ما تخلين لون المكان احمر ولا بنفسجي لان :

الاحمر: يهيج الاعصاب

البنفسجي: يخليج مضايجة بدون سبب

وبعدين طبعا التلفزيون مهم وضروري لمثل هالحالات

من ريلج يظهر لا تمدين البوز بالعكس اضحكي وحاولي تستفزينة يوم تعرفين انة بيظهر بالعمد اسالية متى بتظهر متى بتظهر وانتي مبتسمة

بيقول في خاطرة هاي شو سالفتها تباني اظهر

بيبتدي تساؤلاته وبيستغرب منج واذا ظهر لا تتصلين فية ابد ولا حتى مسج

ملاحظة: هالحركة ما تنفع للزوج الشكاك بعيد عنا وعنكم ان شاء الله

وبعدين طبعا يوم يظهر بتي حالة الاكتئاب اللي عندج اولا حاولي تلبسين لبس حلو مب بجامة تلوع الجبد وتقولين ريلي محد عااادي نفسيتج تتغير باللبس اي وحدة اذا مضايجة سارت ولبست وتعدلت على الخفيف يعني مب شرط ميك اب لا يعني نفسيتج تتغير

وبعدين يلسي شوفيلج فلم وسوي ولا رسوم وياحبذا يكون كوميدي واذا عندج عيال حطي رسوم ويلسي وياهم وحطي في بالج عصبت ولا ما عصبت ما بيتغير شيء الا ان نفسيتي بتتعب ولا بيفتكر ولا بيحس اذا انتي عصبتي

وقولي في خاطرج ليش اعصب وهو مستانس

وبعدين اذا العيال رقدوا حاولي تدلعين عمرج يلسي سويلج اكلة حلوة ولا شاي اخضر لانة يهدي الاعصاب شوفيلج فلم ولا رمسي ربيعاتج

الى ان ياتي سعيد الحظ (الزوج) من يدخل حاولي تضحكين بصوت عالي وتبينين انج مستانسة حدج

ولا تقوليله شيء بالعكس قوليله هلا حبيبي ما تاخرت اليوم ياي من وقت خير ان شاء الله في شيء استعبطي علية
هو بيقول : لا هالحرمة فيها شيء ليش ما تباني اي ومستانسة مب عادتها !!!!!!!!!!!!

وبعدين بيحس بالتغير اذا عنده احساس وبيقول هالحرمة ما تبغي تطلع ومستانسة بطلعتي شو سالفتها خلني اظهرها من البيت واااايد مستانسة روووحها ووووو!!!!!!

ومن يقولج اانا بظهر دشي المطبخ وسوي اكلات حلوة او سويلج كوفي كاباجينو وحطي المكسرات والكاكاو ولبسي بجامة حلوة وسوي حركات حلوة يتغايض منها

والله اني جربت هالحركة كان ريلي واااايد يظهر والحين الحمد لله يحب اييلس في البيت لاني ارقد العيال من وقت واسوي واحط الاكلات اللي يحبها على الطاولة واحط القناة اللي يحبها وارتب البيت واسوي جو حلو واستعبط اوني ابغيه يظهر يعاند واييلس وانا اتم اضحك هو يعاند وانا اقول في خاطري هذا المطلووووووووووووووووب هههههههههههههه

وان شاء الله عقب فترة بتلاحظين ان ريلج يحب يقعد في البيت بس على فكرة تعرفين ليش يبغي اييلس في البيت لانه يبغي يعرف انتي ليش وااايد مستانسة على قعدتج وشو مغيرنج ههههههه مب لسواد عيونج واذا الجو عيبه بيستمر اذا ردت حليمة لعادتها الجديمة بتخربين كل شيء

بس مهم انه اذا يلس لا ترمسين وااايد لان في رياييل يظهرووون عسب حنت ورمسة حريمهم

والله يوفقكم مع رياييلكم ان شاء الله